ఇది నిజం

ఓ ఊరిలో ఇద్దరు మిత్రులున్నారట

వారిద్దరూ ఎప్పుడూ ఏదో విషయంగా
వారు వాదులాడుకుంటూనే ఉంటారట.

ఆ ఊరి వాళ్ళకు వీరి గోల తెలిసినా, క్రొత్తగా ఆ ఊరు వచ్చిన ఆసామికి వీరి గోల తలనొప్పిగా అనిపించి మిత్రులంటే ఏకమాటగా, ఏకత్వంగా, శాంతియుతంగా ఉండాలే కానీ, అయినదానికీ, కానిదానికీ కీచులాడుకునే వాళ్ళు అసలు మిత్రులెలా అవుతారు అని అన్నారట.

విన్న ఆ ఇద్దరూ పక్కున ఓ నవ్వు నవ్వారటా.
పైపెచ్చు ఆ వ్యక్తి వంక పిచ్చివాడివన్నట్లు చూస్తూ,
మంచీ చెడు అని రెండు పదాలు ఉన్నట్లు మేమిద్దరం ఉన్నాము.

కాబట్టే ఏది మంచి ఏది చెడు అనేది ఆలోచించి చేసే
విషయంలోనే మేము కీచులాడుకుంటామే కానీ,
మరొకటికాదు" అన్నారట.

విన్న ఆపెద్ద మనిషి "మీరు చెప్పేది
నాకు అర్ధం కావటంలేదు. కొంచం విపులంగా
చెప్పండి" అని అడగగా,

"ఇందులో అర్ధమైయ్యేలా
చెప్పేదేముంది బాబుగారూ నంగిలా నిమ్మనంగా ఉండి గోతులు త్రవ్వే వారి వలన సమాజానికి హానికానీ కల్మషం లేకుండా గలగలా సెలయేరులా గోలచేసే మావల్ల ఎవరికీ హాని ఉండదు ఏమంటారు" అని అడిగారట. ఆ విషయం నిజమేననిపించిన ఆ ఆసామి తనదారిన తాను వెళ్ళిపోయాడు.